नाशिक – विशेष प्रतिनिधी
नव्या पिढीतील कलाकारांच्या अविष्काराला हक्काचे व्यासपीठ देण्यासाठी ‘सूर विश्वास’ या अनोख्या मैफलीचे आयोजन करण्यात आले आहे. रविवारी (दि. १३) सकाळी सात वाजता शिवाली चंद्रशेखर (लॉस एंजेलिस, अमेरिका) यांचे शास्त्रीय गायन होणार आहे. त्यांना रसिक कुलकर्णी (तबला), दिव्या रानडे(संवादिनी) यांची साथसंगत लाभणार आहे. तर कार्यक्रमाचे सूत्रसंचलन डॉ.स्मिता मालपुरे या करणार आहेत.
मैफिलीचे हे ५२ वे पुष्प असून विश्वास ग्रुपचे कुटुंबप्रमुख विश्वास ठाकूर व रेडिओ विश्वास 90.8 कम्युनिटी रेडिओच्या समन्वयक ऋचिता ठाकूर हे या उपक्रमाचे आयोजक असून संकल्पना विनायक रानडे यांची आहे. विश्वास गार्डन, ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूर रोड, नाशिक येथे हा कार्यक्रम संपन्न होणार आहे. ‘सूर विश्वास’ मध्ये उदयोन्मुख कलावंताच्या प्रयोगशीलेचा अविष्कार रसिकांना दर महिन्याला अनुभवण्यास मिळत आहे.
कला, संगीताला देशाच्या रसिकांच्या सीमा नसतात, त्या व्यापक अनुभूती व आनंद देत असते. याची प्रचिती शिवाली चंद्रशेखर यांच्या संगीत प्रवासाकडे पाहून येते. लहानपणापासूनच त्यांना गायनाची आवड होती आणि त्या ध्यासातूनच त्यांनी संगीत सेवेस सुरूवात केली. घरातूनच त्यांना गायनाचा संगीताचा वारसा मिळाला. लहानपणापासूनच आई सौ. कामिनी चंद्रशेखर यांच्याकडून त्यांनी गायनाचे प्राथमिक धडे घेण्यास सुरूवात केली. त्यानंतर जयपूर घराण्याचे प्रसिद्ध गायक अरूण द्रविड यांच्याकडे शास्त्रशुद्ध गायकीचे शिक्षण घेतले. गायनातील शैली, परंपरा यांचाही त्यांना वेध घेता आला, अभ्यास करता आला. सध्या त्या प्रसिद्ध गायक डॉ. आशिष रानडे (नाशिक) यांचेकडे गेली पाच वर्षे किराणा घराण्याच्या गायकीचे ऑनलाईन आणि ऑफ लाईन शिक्षण घेत आहेत. डॉ. आशिष रानडे यांच्या अभ्यासू, प्रयोगशील गायनशैलीचा त्यांच्या संगीत सेवेच्या वाटचालीत निश्चितच उपयोग होईल. ही त्यांच्या कला साधनेची निष्ठा म्हणावी लागेल. तरी या कार्यक्रमास जास्तीत जास्त संख्येने उपस्थित राहण्याचे आवाहन विश्वास ठाकूर, ऋचिता ठाकूर व विनायक रानडे यांनी केले आहे.
