पुणे –
सावित्रीबाई फुले पुणे विद्यापीठ व ‘ईपी रॉक’ या कंपनीमध्ये ‘सीएसआर’ निधी देण्याबाबत सामंजस्य करार नुकताच पार पडला. या सामंजस्य करारामुळे विद्यापीठ नाशिक उपकेंद्राचा विजेचा प्रश्न कायमस्वरूपी सुटण्यास मदत होणार आहे. तसेच विद्यापीठ उपकेंद्र हे विजेच्या बाबतीत स्वयंपूर्ण होण्याच्या दिशेने वाटचाल करणार आहे.
ईपी रॉक ही कंपनी जगभरामध्ये खाणकाम उद्योगांमध्ये अग्रगण्य कंपनी म्हणून कामकाज करीत आहे. कंपनीतर्फे (सीएसआर) सामाजिक दायित्व निधीतून विद्यापीठ उपकेंद्र नाशिकसाठी १२५ केव्हीए (KVA) च्या सौर ऊर्जा प्रकल्पासाठी ७५ लाख निधी उपलब्ध केलेला आहे. सदर कंपनीतर्फे सौर ऊर्जा प्रकल्प वर्ष ऑगस्ट २०२५ मध्येच विद्यापीठ उपकेंद्रात कार्यान्वित करण्याचे नियोजित आहे.
याप्रसंगी विद्यापीठाच्या वतीने कुलगुरू प्रा. डॉ. सुरेश गोसावी तसेच या कंपनीच्या वतीने कंपनीचे व्यवस्थापक आशिष जैन व धनराज पुरी यांनी पर्यावरणाच्या दृष्टीने फायदेशीर ठरणाऱ्या या सामंजस्य करारावर स्वाक्षरी केली. यावेळी प्रभारी कुलसचिव प्रा. डॉ. ज्योती भाकरे, व्यवस्थापन परिषद सदस्य सागर वैद्य, विद्यापीठाचे नवोपक्रम, नवसंशोधन व साहचर्य विभागाचे संचालक डॉ. देविदास गोल्हार, सीएसआर समन्वयक आदी उपस्थित होते.
