नाशिक (प्रतिनिधी)
शास्त्रीय संगीताची अनुभूती देश विदेश यांच्या सीमा ओलांडून किती समर्पण भावनेने कलाकार जोपासत असतात याची अनुभूती आज सुर विश्वास मैफिलीत आली. शिवाली चंद्रशेखर (लॉस एंजेलिस, अमेरिका) यांच्या प्रयोगशील व लयदार आवाजाने रसिकांची मने जिंकली. रविवारी संपन्न झालेल्या या मैफलीत रसिक कुलकर्णी (तबला), दिव्या रानडे(संवादिनी) दुर्वा पिंगळे (तानपुरा) यांनी त्यांना साथसंगत केली. तकार्यक्रमाचे सूत्रसंचलन डॉ. स्मिता मालपुरे यांनी केले.
कार्यक्रमाची सुरुवात बडा ख्याल “कला ना परे” (विलंबित एकताल) या रचनेने झाली. रागाच्या गंभीरतेला साजेसा असलेला हा राग रसपूर्ण झाला. त्यानंतर छोटा ख्याल “बैरान भई उनबिन” (मध्यलय तीनताल) व “मोरे मन की बिथा ना जाने” (द्रुत लय) या रचनांनी रंगत आणली. या मैफलीत नटभैरव या रागावर आधारित नाट्यगीत “तेजनिधी लोहगोल” सादर करण्यात आले.
कार्यक्रमाचा समारोप भजन “बाजे मुरलिया बाजे” या भावपूर्ण रचनेने झाला. कृष्णभक्तीने ओतप्रोत असलेल्या या भजनाने वातावरण भक्तिमय केले.
मैफिलीचे हे ५२ वें पुष्प होते. विश्वास ग्रुपचे कुटुंबप्रमुख विश्वास ठाकूर व रेडिओ विश्वास 90.8 कम्युनिटी रेडिओच्या समन्वयक ऋचिता ठाकूर हे या उपक्रमाचे आयोजक तर संकल्पना विनायक रानडे यांची होती. विश्वास गार्डन, ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूर रोड, नाशिक येथे हा कार्यक्रम संपन्न झाला. कलावंतांचे स्वागत प्रसाद दुसाने, देविका सराफ, अद्वय पवार, ॲड नंदकिशोर भुतडा, ॲड प्रेरणा देशपांडे, रवींद्र जोगळेकर, ऋचिता ठाकूर, अरुंधती कुलकर्णी, राजश्री शिंपी, प्रवीण मानकर यांचे हस्ते करण्यात आले.
