नाशिक – विशेष प्रतिनिधी
शिवसेना (ठाकरे) पक्षातून हकालपट्टी करण्यात आलेले उपनेते सुधाकर बडगुजर यांना पक्ष प्रवेश देऊ नये यासाठी भारतीय जनता पार्टीतील निष्ठावंत एकवटले आहेत. शिवसेनेतील हकालपट्टीमुळे ‘बार्गेनिंग पॉवर’ गमावलेल्या बडगुजर यांचा ऐनकेन प्रकारे भाजपा प्रवेश झाला तरीही तिथे त्यांना अनेक राजकीय आव्हानांना तोंड द्यावे लागणार आहे. त्यामुळे बडगुजर यांची सध्या तरी राजकीय कोंडी झाल्याचे चित्र स्पष्ट झाले आहे.
शिवसेनेत सत्ता व संघटनेत सर्वच मानाची पदे आणि संधी उपभोगणाऱ्या बडगुजर यांना राज्यात महायुतीचे बहुमताचे सरकार आल्यानंतर सत्तेच्या वळचणीला जाण्याचे स्वप्न पडू लागले. त्यासाठी पहिले पाऊल म्हणून त्यांनी शिवसेनेच्या जिल्हास्तरावर झालेल्या संघटनात्मक बदलाबाबत नाराजी व्यक्त केली. त्यानंतर भाजपा ज्येष्ठ नेत्यांसोबत त्यांची चर्चा झाल्याचे कळताच बडगुजर यांची हकालपट्टी करण्याचा निर्णय झाला. नाशिक शिवसेनेत बडगुजर म्हणतील ती पूर्व दिशा, असे चित्र असतानाही बडगुजर यांचा पक्षबदलाचा निर्णय शिवसेनेच्या नेतृत्वाला दुखावणारा ठरला. त्यामुळेच त्यांना राजीनामा देण्याची संधी न देता थेट हकालपट्टी करत भाजपातील बडगुजर यांच्या राजकीय ‘बार्गेनिंग’ मधील हवा काढून घेण्यात आली.
दुसरीकडे बडगुजर यांना भाजपात प्रवेश देण्यासाठी पक्षांतर्गत विरोध सुरु झाला. विधानसभा निवडणुकीतील प्रतिस्पर्धी असणाऱ्या आमदार सीमा हिरे यांनी या विरोधाला वाचा फोडत बडगुजर यांचे सलीम कुत्ता प्रकरण, मुलावरील गुन्हेगारी स्वरूपांचे आरोप, महापालिकेतील ठेकेदारी, भाजपाच्या वरीष्ठ नेत्यांवर केलेले गंभीर आरोप यांची आरोपांची जंत्रीच वरीष्ठांकडे सादर केली. बडगुजर पक्षात आल्यास सत्तेतील महत्वाच्या पदांची संधी हुकेल, या भितीने नाशिक पश्चिम मतदार संघातील माजी नगरसेवक, पदाधिकारी आ. हिरे यांच्या पाठीशी एकवटले. एवढेच नव्हे तर रा. स्व. संघाच्या वर्तृळातूनही बडगुजर यांना विरोध होत आहे. त्यामुळे आता बडगुजर यांची राजकीय कोंडी झाल्याचे चित्र स्पष्ट झाले आहे. दुसरीकडे बडगुजर यांना पक्षात घेण्यासाठी शिवसेना शिंदे गटातून विरोध केला जात आहे.
विधानसभा निवडणुकीत भाजपाला ‘जय श्रीराम’ करत राष्ट्रवादी शरदचंद्र पवार पक्षात प्रवेश करून माजी स्थायी समिती अध्यक्ष गणेश गिते यांनी निवडणूक लढवली होती. त्यात पराभव झाल्यानंतर गिते पुन्हा स्वगृही परतण्याच्या तयारीत आहेत. मात्र पंचवटी परिसरातील माजी नगरसेवक व पदाधिकाऱ्यांनी त्यांना जोरदार विरोध दर्शवला असून त्यांच्या कथित भुसंपादन घोटाळ्याची माहितीही वरीष्ठांना देण्यात आली आहे. त्यामुळे बडगुजर यांच्याप्रमाणेच गिते यांच्या पक्षप्रवेशाला अपशकून करण्यात आला आहे. आता पक्षश्रेष्ठी काय भूमिका घेतात याकडे सर्वांचेच लक्ष लागले आहे.
