नाशिक – विशेष प्रतिनिधी
सतारीवर फिरणाऱ्या लयदार बोटांतून उमटणारा मधुर नाद, त्यातली गहिरी लयकारी आणि भावस्पर्शी स्वरांची झंकार यांचा अविस्मरणीय अनुभव नाशिकच्या रसिकांना लाभला. नव्या पिढीतील गुणी कलाकारांना व्यासपीठ देण्यासाठी ‘सूर विश्वास’ या उपक्रमांतर्गत आयोजित ५३ व्या पुष्पाच्या रूपाने ही मैफल रंगली. त्यात अमृतसर (पंजाब) येथील तरुण आणि प्रतिभावान कलाकार डॉ. सुमित सिंह पदम यांच्या सुरेल सतारवादनाने कार्यक्रमास रंगत आली. त्यांना रसिक कुलकर्णी (तबला) यांची सुंदर साथसंगत लाभली. मैफलीचे सूत्रसंचालन डॉ. स्मिता मालपुरे यांनी केले.
विश्वास ग्रुपचे कुटुंबप्रमुख विश्वास ठाकूर व रेडिओ विश्वास ९०.८ कम्युनिटी रेडिओच्या समन्वयक ऋचिता ठाकूर यांच्या पुढाकाराने व विनायक रानडे यांच्या संकल्पनेतून या उपक्रमाची सुरूवात झाली असून, कार्यक्रमाचे आयोजन विश्वास गार्डन, ठाकूर रेसिडेन्सी, विश्वास को-ऑपरेटिव्ह बँकेसमोर, सावरकरनगर, गंगापूर रोड, नाशिक येथे करण्यात आले होते.
डॉ. सुमित सिंह यांनी संगीत मैफलीची सुरुवात सकाळच्या प्रहरातील राग अहिर भैरव या गंभीर आणि माधुर्यपूर्ण रागाने झाली. या रागातील आलाप-तानांनी प्रेक्षकांना सकाळच्या शांत, प्रसन्न वातावरणाची अनुभूती दिली. त्यानंतर पावसाळी वातावरणाशी सुसंगत असा राग मियां मल्हार सादर करण्यात आला. या रागातील मनमोहक बंदिशींनी उपस्थित रसिकांना पावसाच्या सरींप्रमाणे ताजेतवाने केले.
कार्यक्रमाची सांगता भक्तिरसाने ओथंबलेल्या सुंदर भजनांच्या सादरीकरणाने झाली. भजनातील भावस्पर्शी गायनामुळे रसिकांना अध्यात्मिक समाधान आणि संगीताचा परिपूर्ण आनंद लाभला.
कार्यक्रमानिमित्त कलावंतांचा सत्कार डॉ. मनोज शिंपी, स्वाती शहा, ज्ञानेश्वर कासार, डॉ. श्रद्धा वाळवेकर व ऋचिता ठाकूर यांच्या हस्ते सन्मानपत्र देऊन करण्यात आला. तसेच तबलावादक अथर्व नितीन वारे व सतारवादक रवी थोरात यांचाही सन्मान करण्यात आला.
