– ‘वॉक इन टूर ऑफ नाशिक सीपी ऑफिस’
नाशिक । प्रतिनिधी
गंगापूर रोडवरील पोद्दार इंटरनॅशनल स्कूल मधील ७० विद्यार्थ्यांनी मंगळवारी ‘वॉक इन टूर ऑफ नाशिक सीपी ऑफिस’ या मोहिमेतंर्गत पोलीस आयुक्तालयास भेट दिली. याप्रसंगी विद्यार्थ्यांनी वाहतूक नियमांचे धडे गिरवत सुजाण नागरिक होण्यासाठी पहिले पाऊल टाकले.
पोलीस आयुक्त संदीप कर्णिक यांच्या मार्गदर्शनाखाली शालेय विद्यार्थ्यांना दर मंगळवारी “वॉक इन टूर ऑफ नाशिक सीपी ऑफिस” हा उपक्रम राबविण्यात येतो. या भेटी दरम्यान विद्यार्थ्यांना आयुक्तालयातील आवक, जावक शाखा, चारित्र्य व पासपोर्ट पडताळणी शाखा, नियंत्रण कक्ष, डायल ११२, ट्रॅफिक कंट्रोल नियंत्रण कक्ष, वाहतूक नियमांचे जनजागृती आदी कामकाजाची प्रत्यक्ष माहिती देण्यात आली. यावेळी पोलीस उपआयुक्त मुख्यालय व वाहतूक श्रीमती किरीथिका सी.एम यांच्या हस्ते विद्यार्थ्यांना ‘ट्रॅफिक ॲम्बेसिडर’ बॅच चे वाटप करण्यात आले.
याप्रसंगी प्रादेशिक परिवहन कार्यालयाच्या (आरटीओ) उप प्रादेशिक परिवहन अधिकारी श्रीमती राजश्री गुंड, सहायक परिवहन अधिकारी महेश देशमुख, पोलीस निरीक्षक जुमडे सहाय्यक पोलीस निरीक्षक श्रीमती इनामके, युनिट दोनचे पोलीस हवालदार सचिन जाधव, शाळेचे मुख्याध्यापक महाजन सर तसेच फारुख सर, सपकाळे सर श्रीमती अंजली आदी उपस्थित होते.
