नाशिक – विशेष प्रतिनिधी
शहरात गटारी अमावस्या साजरी होत असताना सावधगिरीचा उपाय म्हणून पोलिसांनी प्रथमच दिवसा कोम्बिंग अॉपरेशन राबवले. बुधवारी झालेल्या या मोहिमेत तब्बल १६६ सराईत गुन्हेगार जेरबंद करण्यात आले.
शहरातील कायदा व सुव्यवस्था अबाधित राहावी, यासाठी पोलीस आयुक्त संदीप कर्णिक यांच्या आदेशान्वये बुधवारी राबवण्यात आलेल्या या मोहिमेसाठी शहर पोलीस आयुक्तालयातील सर्वच पोलीस ठाणे व गुन्हे शाखा पथक रस्त्यावर उतरले होते. या अचानक कारवाईमुळे सराईत गुन्हेगारांमध्ये धडकी भरली होती.
या कारवाईत तब्बल १६६ सराईत गुन्हेगार यांना आपआपल्या पोलीस ठाणे तसेच शाखा येथे आणून त्यांचेकडे कसून चौकशी करण्यात आली. तसेच त्यांच्या घर झडत्याही घेण्यात आल्या. या मोहिमेत पोलीस आयुक्त संदीप कर्णिक, पोलीस उपायुक्त किरणकुमार चव्हाण, श्रीमती मोनिका राऊत, किशोर काळे यांच्यासह सर्व विभागाचे सहायक आयुक्त तसेच पोलीस ठाण्यांचे वरिष्ठ निरीक्षक तसेच अधिकारी व कर्मचारी सहभागी झाले होते.
पोलीस ठाणेनिहाय केलेली कारवाई पुढीलप्रमाणे – आडगाव, पंचवटी, म्हसरूळ, गंगापूर, मुंबई नाका, सातपूर, अंबड, इंदिरानगर, उपनगर, देवळाली कॅम्प, चुंचाळे, अंमली पदार्थ विरोधी पथक प्रत्येकी १०, भद्रकाली (१३), सरकारवाडा (८), नाशिकरोड (१४), गुन्हे शाखा युनिट (२).
