पंचवटी – विशेष प्रतिनिधी
पुरोहित संघाबरोबर पोलिसांची सतत समन्वयाची भूमिका राहील आणि आगामी कुंभमेळा काळात
दोघेही हातात हात घालून काम करू, असे प्रतिपादन पोलिस आयुक्त संदीप कर्णिक यांनी केले. श्रीगंगा गोदावरी पंचकोठी पुरोहित संघासमवेत पोलिस आयुक्त कर्णिक यांची समन्वयक बैठक झाली त्यावेळी ते बोलत होते.
नवनिर्वाचित पुरोहित संघाच्या कार्यकारणीचे कर्णिक यांनी स्वागत केले व भावी वाटचालीसाठी शुभेच्छा दिल्या. तीर्थावर तसेच कुंभमेळा काळात येणाऱ्या भाविकांसाठी चांगल्या सुविधा कशा देता येतील, त्याचे नियोजन कसे करता येईल व गोदाप्रेमींना ते कसे सुखावह ठरेल तसेच कुंभमेळा निर्विघ्नपणे संपन्न व्हावा यासाठी काय उपाययोजना कराव्या लागतील याबाबतही बैठकीत विस्तृत चर्चा झाली.
पोलीस आयुक्त कर्णिक यांनी पुरोहित संघाच्या सदस्यांच्या सूचना जाणून घेऊन काही मुद्द्यांचे तत्काळ निरसन केले. कुंभमेळा काळात कायदा व सुव्यवस्थेची योग्य ती काळजी घेतली जाईल, असे आश्वासनही कर्णिक यांनी यावेळी दिले. बैठकीस नवनिर्वाचित अध्यक्ष चंद्रशेखर पंचाक्षरी, उपाध्यक्ष वेदमूर्ती शेखर शुक्ल, नितीन पाराशरे व निखिल देव, संघटक धनंजय बेळे, कोषाध्यक्ष वैभव क्षेमकल्याणी, चैतन्य गायधनी, अमित पंचभैये, अमित गायधनी, सदानंद देव, राहुल अगस्ते, उपेंद् देव, सौरभ गायधनी, मंदार देव, माणिक शिंगणे आदी पदाधिकारी तसेच पोलिस उपायुक्त किरणकुमार चव्हाण,सहाय्यक पोलिस आयुक्त संदीप मिटके व कुंभमेळा कक्षाचे पोलीस अधिकारी उपस्थित होते.
