नाशिक – विशेष प्रतिनिधी
जेलरोड परिसरात तलवार घेऊन फिरणारा व दहशत निर्माण करणारा सुमित किशोर चंडालिया (वय-२४ वर्ष, रा. साईनाथनगर, गोरेवाडी जवळ, ट्रक्शनरोड, नाशिकरोड) यास गुन्हे शाखेच्या पथकाने रंगेहाथ पकडले. त्याच्या विरुद्ध नाशिकरोड पोलीस ठाण्यात गुन्हा नोंदवण्यात आला आहे.
याबाबतचे अधिक वृत्त असे की, गुन्हे शाखेच्या युनिट दोनचे हवालदार नितीन फुलमाळी यांना गोपनिय बातमी मिळाली की, गोरेवाडी रेल्वे ट्रक्शनकडे जाणाऱ्या रोडवर, जुना रेल्वे ट्रॅक, मनपा व्यायाम शाळेजवळ, येथे एका इसमाकडे त्याच्या कब्जात धारदार तलवार असुन तो फिरत आहे अशी बातमी मिळाली. ही बातमी सहायक निरीक्षक हेमंत तोडकर यांना देण्यात आली. त्यानंतर सहायक उपनिरीक्षक शंकर काळे, प्रेमचंद गांगुर्डे, हवालदार मनोहर शिंदे, नितीन फुलमाळी, वाल्मीक चव्हाण, प्रविण वानखेडे यांनी मिळालेल्या माहितीच्या आधारे सापळा रचून आरोपीस अटक केली.
याप्रकरणी हवालदार नितीन फुलमाळी यांनी दिलेल्या तक्रारी वरून नाशिकरोड पोलीस ठाणे येथे भारतीय हत्यार कायदा कलम ४/२५ व म.पो.का.क १३५ प्रमाणे गुन्हा दाखल करून आरोपीस पुढील कारवाई कामी जप्त मुददेमालासह नाशिकरोड पोलीस स्टेशच्या ताब्यात देण्यात आले आहे.
पोलीस आयुक्त संदिप कर्णिक, गुन्हे शाखेचे उपायुक्त प्रशांत बच्छाव, सहायक आयुक्त संदीप मिटके यांचे मार्गदर्शनाखाली गुन्हेशाखा युनिट २ कडील सहायक निरीक्षक हेमंत तोडकर, डॉ. समाधान हिरे, सहायक उपनिरीक्षक शंकर काळे, प्रेमचंद गांगुर्डे, हवालदार मनोहर शिंदे, नितीन फुलमाळी, वाल्मीक चव्हाण, प्रविण वानखेडे जितेंद्र वजीरे यानी ही कामगिरी केलेली आहे.
