नाशिक – विशेष प्रतिनिधी
उझबेकीस्तान येथे दि. २६ ते २ जुलै २०२५ दरम्यान झालेल्या २९ व्या एशियन यूथ टेबल टेनिस चॅम्पियनशिप २०२५ मधे नाशिकच्या तनिशा कोटेचा हीने मिश्र दुहेरीत भारताच्या अंकुर भट्टाचार्यजी याच्या साथीने मिश्र दुहेरीत कांस्य पदक पटकावले. या स्पर्धेत चायना, जपान, कोरिया रिपब्लिक, चाईनीज ताईपाई, सिंगापूर, भारत अशा प्रमुख देशाचे संघ सहभागी झाले होते. तनिशा कोटेचा हीने आतापर्यंत ज्युनियर गटाच्या राष्ट्रीय स्पर्धेसह सर्व जागतिक जूनियर स्पर्धेत भारताचे आजवर प्रतिनिधित्व करत प्रत्येक स्पर्धेत पदक पटकावले आहे. त्यामध्ये जागतिक ज्युनियर टेबल टेनिस स्पर्धा, एशियन जूनियर चॅम्पियनशिप, साउथ एशियन चॅम्पियनशिप, ब्रिक्स गेम्स व राष्ट्रीय टेबल टेनिस स्पर्धांचा समावेश आहे.
तनिशा कोटेचा व अंकुर भट्टाचार्याजी या जोडीने उप उपांत्य पूर्व फेरीत या स्पर्धेत सहावे मानांकन असलेल्या सिंगापूरच्या क्वेक आयझॅक व सेर लिन या जोडीचा अत्यंत चुरशीच्या सामन्यात ३-२ ने पराभव करून उपांत्य पूर्व फेरीत प्रवेश केला. या फेरीत तनिशा आणि अंकुर यांनी जपान च्या जगतिक अव्वल मानांकन असलेली योशियामा काझुकी व रीन मेंदे या जोडीचा ३-० असा पराभव करून सर्वांना आश्चर्याचा धक्का देत उपांत्य फेरीत प्रवेश केला. उपांत्य फेरीत कोरियाच्या या स्पर्धेत तिसरे मानांकन असलेल्या किम गॉन व पार्क घाइओन यांच्या बरोबर झालेल्या अत्यंत चुरशीच्या सामन्यात कोटेचा आणि भट्टाचार्यजी या जोडीला ३-२ ने पराभवाला सामोरे जावे लागले त्यामुळे ही भारतीय जोडी कांस्य पदकाची मानकरी ठरली.
तिच्या या यशाबद्दल नासिक जिल्हा टेबल टेनिस असोसिएशनचे अध्यक्ष नरेंद्र छाजेड, महाराष्ट्र टेबल टेनिस असोसिएशनचे अध्यक्ष प्रवीण लुंकड, सरचिटणीस यतिन टिपणीस, शेखर भंडारी, राजेश भरवीरकर, अभिषेक छाजेड, कोच जय मोडक, संजय कडू आदी मान्यवरांनी अभिनंदन केले आहे.
