नाशिक – विशेष प्रतिनिधी
उपनगर पोलीस ठाण्याच्या हद्दीत दुचाकीवरून आलेल्या दोघा स्नॅचरने दोन महिलांच्या गळ्यातील सोन्याचे दागिने खेचून पळवले. यात दोन लाख १० हजारांचा ऐवज जबरीने चोरून नेला असून पोलिसांनी दोन स्वतंत्र गुन्हे नोंदवले आहेत. शहरात चेन स्नॅचिंगच्या घटना पुन्हा वाढीस लागल्याने महिलांमध्ये भितीचे वातावरण आहे.
पोलिसांनी दिलेल्या माहितीनुसार, सौ. चंद्रभागा नारायण अंभोरे (वय ५५, रा. समता नगर, आगर टाकळी रोड, गांधीनगर) या इंद्रायणीनगर बस स्टॉपवर उभ्या असताना दुचाकीवरून दोघे जण हेल्मेट परिधान करून आले. त्यापैकी मागे बसलेल्याने सौ. अंभोरे यांच्या गळ्यातील एक लाख १० हजार रुपये किंमतीचे सोन्याचे मंगळसूत्र खेचले. त्यानंतर दोघांनी पळ काढला.
दुसरी घटना बिटको नजिकच्या गंधर्वनगरी चौकातील रिक्षा थांब्याजवळ घडली. किरण वंसत समेळ (वय ६५, रा. प्लॉट नं ०९, ईरन गार्डन सोसायटी, तुलसी आय हॉस्पिटल जवळ, नाशिक पुणेरोड) हे आत्या श्रीमती रजनी दिनानाथ समेळ (वय ८८) व श्रीमती वंदना देसाई यांच्या समवेत औषध खरेदी करून गंधर्वनगरी चौक येथून पायी जात असताना पाठीमागून एका मोटारसायकल वरून दोघेजण आले. त्यापैकी मागे बसलेल्याने श्रीमती रजनी समेळ यांच्या गळ्यातील एक लाख रुपये किंमतीची सोन्याची चेन खेचली. त्यानंतर दोघांनी पळ काढला. उपनगर पोलीस ठाण्यातील सहायक निरीक्षक दाभाडे दोन्ही गुन्ह्यांचा तपास करत आहेत.
