पंचवटी – विशेष प्रतिनिधी
शाळा व महाविद्यालयांमध्ये जाणाऱ्या युवतींना हेरून त्यांची छेड काढण्याच्या घटना सातत्याने वाढत आहे. याबाबतीत कठोर उपाययोजना होत नसल्याने रोडरोमिओंनी शहरात उच्छाद मांडला आहे. मखमलाबाद परिसरात स्कूल व्हॅनची वाट बघणाऱ्या शाळकरी मुलीचे भररस्त्यात चुंबन घेत पळ काढला. याप्रकरणी म्हसरूळ पोलिसांनी ‘पोस्को’ अन्वये गुन्हा नोंदवला आहे.
पोलिसांनी दिलेल्या माहितीनुसार, मंगळवारी सकाळी पिडीत मुलगी मखमलाबाद मधील मानकर मळा परिसरात शाळेत जाण्यासाठी स्कूल व्हॅनची वाट पहात उभी होती. यावेळी एका अनोळखी मुलाने मागून येऊन तिचे चुंबन घेत तिच्या मनास लज्जा उत्पन्न होईल असे कृत्य केले व पळ काढला. यामुळे भेदरलेल्या पिडीतेने घरी जाऊन पालकांना या घटनेची माहिती दिली. पालकांनी म्हसरूळ पोलीस ठाण्यात याप्रकरणी तक्रार दिल्यानंतर भारतीय न्याय संहिता कलम ७४ व ‘पोक्सो’ कलम ८ अन्वये गुन्हा नोंदविला आहे. या घटनेमुळे पालकांमध्ये चिंतेचे वातावरण आहे. शाळांच्या वेळेत पोलीस व दामिनी पथकाची गस्त वाढवण्याची मागणी होत आहे. म्हसरूळ पोलीस ठाण्याचे वरिष्ठ निरीक्षक अंकुश चिंतामणी यांच्या मार्गदर्शनाखाली उपनिरीक्षक श्रीमती तुरे तपास करत आहेत.
