नाशिक – विशेष प्रतिनिधी
अवघ्या महाराष्ट्राला आषाढी एकादशीचे वेध लागलेले असताना नाशिकमध्ये त्यासाठी लगबग सुरू झाली आहे. सतत वैशिष्ट्यपूर्ण कार्यक्रम साजरा करत नाशिककरांच्या हृदयात स्थान मिळवणाऱ्या ‘संस्कृती नाशिक’ या संस्थेतर्फे रविवारी (दि. ६) सकाळपासून हुतात्मा अनंत कान्हेरे मैदान येथे आगळ्यावेगळ्या पांडुरंगाची वारीचे आयोजन करण्यात आले आहे.
‘संस्कृती नाशिक’ चे अध्यक्ष शाहू खैरे यांनी याबाबतची माहिती दिली आहे. ‘संस्कृती नाशिक’ ही संस्था नेहमीच आपल्या सातत्यपूर्ण आणि वैशिष्ट्यपूर्ण कार्यक्रमाने नाशिककरांना सुपरिचित ञआहे. मग ती पाडवा पहाट असो किंवा विविध स्वरूपाच्या व्याख्यानमाला. त्याच परंपरेत आता
यावर्षी आषाढी एकादशीला पांडुरंगाची वारी नाशिक शहरात दिंडीच्या रूपात साजरी करणार आहेत. वारीचा हा सोहळा अत्यंत दैदिप्यमान स्वरूपात जागतीक स्तराची किर्ती संपादन करणारा वैशिष्ठपूर्ण सोहळा ठरणार आहे.
यात नाशिककरांसोबतच विविध शाळातील विद्यार्थी देखील सहभागी होणार आहेत. विद्यार्थ्यांना येण्या-जाण्या करीता बसची सोय करण्यात येणार आहे. तसेच सर्व सहभागी भाविकांना आणि विद्यार्थ्यांना अल्पोपहार खिचडी, केळी, राजगिरा लाडू, पाण्याची बाटली देण्यात येणार आहे. हा कार्यक्रम आषाढी एकादशी रविवार दि. ६ जुलैस सकाळी ७.०० वाजेपासून अनंत कान्हेरे मैदान (गोल्फ क्लब) येथे संपन्न होणार आहे.
