नाशिक – विशेष प्रतिनिधी
पश्चिम बंगाल येथे बॉम्बस्फोट करून नाशिकमध्ये नाव व वेष बदलून वास्तव्य करणाऱ्या संशयितास शहर पोलिसांच्या युनिट एकच्या पथकाने सातपूर येथून ताब्यात घेतले. ‘एनआयए’ अर्थात राष्ट्रीय तपास यंत्रणेच्या कोलकात्ता युनिटने या संशयिताबाबत माहिती दिल्यानंतर पोलीस आयुक्त संदीप कर्णिक यांच्या आदेशानुसार ही कारवाई करण्यात आली आहे.
याबाबतचे अधिक वृत्त असे की, पश्चिम बंगाल येथे बॉम्बस्फोट करून फरार आरोपी हा नाशिक शहरात वेष व नाव बदलून वास्तव्य करीत असल्याची राष्ट्रीय तपास यंत्रणा (एनआयए) यांना माहीती मिळाली होती. त्याबाबत राष्ट्रीय तपास यंत्रणा (एनआयए) चे कलकत्ता युनिटचे अधिकारी व अंमलदार यांचे एक पथक हे नाशिक शहरात पाहीजे असलेल्या आरोपीताचा शोध घेण्यासाठी आले होते. या पथकाने पोलीस आयुक्त कर्णिक यांची भेट घेऊन संशयिताचा माग काढण्याची विनंती केली होती. त्यानुसार गुन्हे शाखेचे उपायुक्त किरणकुमार चव्हाण, सहायक आयुक्त संदीप मिटके यांनी युनिट एकच्या पथकास संशयितास जेरबंद करण्याचे आदेश दिले.
युनिट एकच्या पथकाने सातपूर औद्योगिक वसाहतीत व परिसरात सतत दोन दिवस अहोरात्र मेहनत घेवून संशयिताचा ठावठिकाणा व तो राहत असलेल्या ठिकाणाची माहीती मिळवली. त्या माहीतीच्या आधारे संशयितास पकडण्यात यश आले. त्यास कोलकात्ता येथील एनआयए पथकाच्या हवाली करण्यात आले आहे. युनिट एकचे वपोनि कड, उपनिरीक्षक चेतन श्रीवंत, हवालदार महेश साळुंके, राहुल पालखेडे, आप्पा पानवळ, राम बर्डे, विलास चारोस्कर, नितीन जगताप, नाझीमखान पठाण , समाधान पवार यांनी ही कामगिरी बजावली. ‘एनआयए’ च्या पथकाने युनिट एकच्या पथकाला प्रशस्तीपत्रक देत कौतूक केले.
