– महिलांना ‘टार्गेट’ करण्याच्या घटना सुरूच…
पंचवटी – प्रतिनिधी
आडगाव पोलीस ठाण्याच्या हद्दीतील अमृतधाम व कोणार्कनगर परिसरात चेन स्नॅचिंगच्या दोन घटना घडल्या आहेत. पहिल्या घटनेत इमारतीच्या लिफ्टमध्ये प्रवेश करणाऱ्या महिलेच्या गळ्यातील
सोन्याचे गंठण ओरबडण्यात आले. तर दुसऱ्या घटनेत घरासमोर मैत्रिणीसोबत गप्पा मारणाऱ्या महिलेच्या गळ्यातील सोन्याचे मंगळसूत्र खेचून पळवण्यात आले. यात एकूण दोन लाख ९५ हजारांचा ऐवज खेचून नेण्यात आला आहे.
याबाबतचे अधिक वृत्त असे की, सौ. अरुणा शशिकांत देशपांडे (वय ५९, रा. फ्लॅट नं ९, रमन हाईटस, परिसमणी गणपती मंदिराच्या समोर, अमृतधाम) या सायंकाळी पावणेआठ वाजेच्या सुमारास तिसऱ्या मजल्यावर असलेल्या घरी जाण्यासाठी लिफ्टमध्ये शिरत होत्या. यावेळी पाठीमागून आलेल्या ३० ते ३५ वयोगटातील युवकाने त्यांच्या गळ्यातील ३५ ग्रॅम वजनाचे व दोन लाख १० हजार रुपये किंमतीचे सोन्याचे गंठण बळजबरीने खेचून घेतले व पलायन केले.
दुसऱ्या घटनेत उषा तेजराव पाटोळे (वय ४६, रा. रो हाऊस नं १, रोनक रो हाऊस, बालाजी रेसिडेन्सी जवळ, बालाजी चौक, कोणार्कनगर, आडगाव) या सायंकाळी ७.१५ वाजता घराच्या गेटच्या समोरील रस्त्यावर मैत्रिणीसोबत गप्पा मारत थांबल्या होत्या. तेव्हा तिथे आलेल्या संशयिताने त्यांच्या गळ्यातील ८५ हजार रुपये किंमतीचे व १५ ग्रॅम वजनाचे सोन्याचे मणी मंगळसूत्र व त्यातील दोन वाटया असा ऐवज खेचून पळ काढला. दोन्ही घटनांमधील संशयिताचे वर्णन सारखेच असून तो वय अंदाजे ३५ ते ४० वर्षे, अंगाने सडपातळ, दंडाला तांबडे लाल रंगाचे चमकणारे पटटया असलेले जॅकेट अंगात घातलेले होते. आडगाव पोलिसांनी गुन्हा नोंदवला असून उपनिरीक्षक पंचमुख तपास करत आहेत.
