नाशिक – विशेष प्रतिनिधी
शासनाच्या महात्मा ज्योतिबा फुले जन आरोग्य योजनेअंतर्गत शस्त्रक्रिया झालेली असून शस्त्रक्रिया व पेशंट यांना डिस्चार्ज देण्यासाठी ३० हजारांची मागणी करून ११ हजारांची लाच स्वीकारल्याप्रकरणी नामको कॅन्सर हॉस्पिटलच्या वैद्यकीय अधीक्षक डॉक्टर विशाखा जहागिरदार यांच्यासह तीन महिलांविरुद्ध लाचलुचपत प्रतिबंधक विभागाने कारवाई केली आहे. वैद्यकीय क्षेत्रातील लाचखोरी व त्यात तीन महिलांचा सहभाग उघड झाल्याने खळबळ उडाली आहे.
लाचलुचपत प्रतिबंधक विभागाच्या अधीक्षक श्रीमती शर्मिष्ठा घारगे-वालावलकर यांच्या मार्गदर्शनाखाली उपअधीक्षक श्रीमती स्वाती पवार, हवालदार शरद हेंबाडे, युवराज खांडवी, परशराम जाधव, राजश्री अहिरराव यांनी ही कामगिरी केली आहे.
‘एसीबी’ च्या सूत्रांनी दिलेल्या माहितीनुसार, डॉ. जहागिरदार, महिला कॅशियर तसेच गायत्री सोमवंशी अशी तिघा लाचखोरांची नावे आहेत.
याबाबतचे अधिक वृत्त असे की, तक्रारदार हे पिवळे रेशन कार्डधारक असून त्यांची पत्नी यांचे नामको कॅन्सर हॉस्पिटल पेठ रोड नाशिक येथे शासनाच्या महात्मा ज्योतिबा फुले जन आरोग्य योजनेअंतर्गत शस्त्रक्रिया झालेली आहे. शस्त्रक्रिया व पेशंट यांना डिस्चार्ज देण्यासाठी तक्रार आरोपींनी तीन एप्रिल रोजी ३० हजारांची मागणी केली होती. त्यापैकी नऊ हजार रूपये घेण्यात आले होते.
याबाबत लाचलुचपत प्रतिबंधक विभागाकडे तक्रार केल्यानंतर पडताळणी करण्यात आली. त्यानंतर
उर्वरीत २१ हजारांपैकी ११ हजार रूपये सात एप्रिल रोजी स्वीकारल्याप्रकरणी कारवाई करण्यात आली. याप्रकरणी पंचवटी पोलीस ठाण्यात भ्रष्टाचार प्रतिबंध अधिनियम अन्वये कारवाई करण्यात आली.
