नाशिक –
येथील नाट्यरसिक, नाशिक तर्फे स्व. मनोज नागपुरे यांच्या स्मृतिप्रित्यर्थ सोमवार दिनांक ९ जून रोजी ६ व्या एकांकिका महोत्सवाचे आयोजन करण्यात आल्याची माहिती समूह प्रशासक श्रीराम वाघमारे यांनी दिली.
नुकताच नाट्यरसिक, नाशिक तर्फे ५ वा एकांकिका महोत्सव आयोजित करण्यात आला होता. त्या अंतर्गत “वळण” (लेखक राजेंद्र चिंतावार, दिग्दर्शक महेंद्र चौधरी), “अंतिम सत्य” (लेखक विकास सोनवणे, दिग्दर्शक विकास सोनवणे, जयदीप पवार) आणि “रंग रंगीला बैल सयाना” (लेखक, दिग्दर्शक हेमंत गवळे) या एकांकिकांचे सादरीकरण करण्यात आले.
दिनांक ९ जून रोजी परशुराम साईखेडकर नाट्यगृह येथे सायंकाळी ५.३० वाजता आयोजित करण्यात आलेल्या एकांकिका महोत्सवात स्वप्ना प्रसाद लिखित, दिग्दर्शित “टिक टिक टिक”, श्रीराम वाघमारे लिखित, धनंजय वाबळे दिग्दर्शित “आनंद” आणि शरद तिळवणकर लिखित, सतिश वराडे दिग्दर्शित “शर्मिली शोध” या एकांकिका तसेच धनंजय वाबळे दिग्दर्शित “जंक्शन” या नाट्यप्रवेशाचे सादरीकरण होणार आहे. प्रकाश योजना जयदीप पवार तर संगीत संयोजन सचिन रहाणे यांचे आहे.
या एकांकिकांमध्ये जय शुक्ल, पूजा चव्हाण, रोहन पाटील, स्वानंदी पवार, प्रतिक जोशी, श्रीराम गोरे, मंजुषा ठाकरे, गीतांजली नाईक, ज्योत्स्ना डगळे, सनी धात्रक, किर्ती नागरे, संकेत पगारे, संगीता सोनार, हर्षाली भोसले, ध्रुव ठोके, आभास विंगळे, तनिष्क देशपांडे, उपासना वानखेडे, निरंतरा पाटील, भार्गवी कलंत्री, अनंत पाटील, हिरण्या खालकर, सान्वी भामरे, आरव ठाकरे, शुद्धेन भामरे, आरोही ठाकरे, देवाशिष जगताप, सारिका कलंत्री, मनिषा ठाकरे, कुणाल विधाते इत्यादी कलाकार भूमिका साकारत आहेत. या महोत्सवासाठी श्रीकांत बेणी यांचे विशेष सहकार्य लाभले असून आयोजन समिती मध्ये संगीता फुके, मंजुषा ठाकरे, गीतांजली नाईक, दिपा पाटील, अविनाश वाघ, जयप्रकाश पुरोहित, कैलास पाटील हे विशेष परिश्रम घेत आहेत. एकांकिका महोत्सव हा नाट्यरसिक आणि रसिक प्रेक्षकांसाठी विनामूल्य आहे. तरी मोठ्या संख्येने उपस्थित राहण्याचे आवाहन आयोजकांनी केले आहे.
