गुरूग्राम –
हरियाणाची राज्यस्तरीय टेनिसपटू व ‘आयटीएफ’ डबल्समध्ये ११३ वे मानांकन प्राप्त राधिका यादव या २५ वर्षीय खेळाडूला इन्स्टाग्रामवर रील बनविणे जिवावर बेतले आहे. तिच्या जन्मदात्या पित्यानेच रागाच्या भरात रिव्हॉल्वरमधून पाच गोळ्या झाडत राधिकाला संपवले. यामुळे क्रीडा विश्वात हळहळ व्यक्त होत आहे.
सूत्रांनी दिलेल्या माहितीनुसार, आज (दि. १०) दुपारी १२ वाजता गुरुग्राममधील सेक्टर ५७ मधील निवासस्थानी ही धक्कादायक घटना घडली आहे. इन्स्टाग्रामवर रील बनविण्यावरून वाद झाला. रागाच्या भरात पित्याने लायसन्स असलेल्या रिव्हॉल्वरमधून पाच गोळ्या राधिकावर झाडल्या. त्यातील तीन गोळ्या लागल्याने ती गंभीर जखमी झाली. गोळीबाराच्या आवाजाने नागरीक व पोलिसांनी धाव घेतली. त्याही अवस्थेत तिला खासगी रुग्णालयात नेण्यात आले. तिथे उपचार सुरु असताना तिची प्राणज्योत मालवली. पोलिसांनी राधिकच्या पित्यास रिव्हॉल्वरसह ताब्यात घेतले आहे. राधिकाने राष्ट्रीय व आंतरराष्ट्रीय टेनिस स्पर्धेत सहभाग घेतला आहे.
