नाशिक – विशेष प्रतिनिधी
दारूच्या आहारी जाऊन घरातच धिंगाणा करणाऱ्या विशाल गोकुळ पाटील याचा तोंडावर उशी दाबून तसेच ओढणीने गळफास देऊन खून केल्याची घटना शिवाजीनगर (सातपूर) परिसरात समोर आली आहे. ही शवविच्छेदनातून उघड झाल्यानंतर गंगापूर पोलिसांनी मयत युवकाचे आई-वडील तसेच मेहूण्यास अटक केली आहे.
पोलिसांनी दिलेल्या माहितीनुसार, विशाल पाटील हा मद्यपी युवक घरात निपचित पडला असल्याची माहिती गंगापूर पोलिसांना मिळाली. त्यानुसार गंगापूर पोलीस ठाण्याचे वरीष्ठ निरीक्षक जगवेंद्रसिंग राजपूत, सहायक निरीक्षक निखील पवार यांनी पथकासह घटनास्थळी धाव घेतली. विशाल यास जिल्हा रुग्णालयात हलवले असता तो मयत असल्याचे आढळून आले. अंगावर कोणत्याही जखमा नसल्याने मृत्यूचे नेमके कारण शोधण्यासाठी शवविच्छेदनासाठी मृतदेह पाठवण्यात आला. यात मयताच्या मानेचे मणके तुटलेले असल्याचे तसेच गळा आवळल्याचे निष्पन्न झाले. त्यामुळे पोलिसांनी घरच्यांवर तपासाची दिशा निश्चित केली.
गंगापूर पोलिसांनी केलेल्या अधिक तपासात मयत विशाल पाटील याला दारूचे अधिक व्यसन होते. दारू पिल्यानंतर आई-वडिलांना व मेव्हण्यास शिवीगाळ व मारहाण करायचा. विशालच्या सततच्या त्रासाला घरचे कंटाळले होते. मयताची पत्नी पूजा विशाल पाटील यांनी दिलेल्या तक्रारीनुसार, शुक्रवारी सकाळी ११ वाजता विशाल पाटील घरी आला. दारू पिण्यासाठी पैसे मागितले. परंतू पैसे न मिळाल्याने तो घरातील भांडी विकण्यासाठी घेऊन जाऊ लागला. यावरून वाद झाला. तेव्हा विशाल हा सवयीप्रमाणे मारहाण व शिवीगाळ करू लागला. तेव्हा विशाल यासही मारहाण करण्यात आली. विशाल हा आवरला जात नसल्याने त्याच्या तोंडावर उशी दाबण्यात आली तसेच ओढणीने गळा आवळण्यात आला. यातच विशालचा मृत्यू झाला. याप्रकरणी वडील गोकुळ पाटील, आई शशिकला पाटील व मेव्हणे उमेश काळे यांना अटक करण्यात आली आहे.
