उदयपूर –
अहमदाबाद विमानतळावर गुरूवारी दुपारी झालेल्या भीषण विमान अपघातात शेकडो प्रवाशांना क्षणार्धात प्राण गमवावे लागले. यात राजस्थानमधील एका दाम्पत्याचा तीन लहानग्या मुलांचा समावेश आहे. पत्नी व मुलांना लंडनमध्ये स्थाईक करण्याचे सॉफ्टवेअर व्यावसायिकाचे स्वप्न होते. त्यात अनेक अडचणी येत होत्या. अखेरीस पत्नीला व मुलांना ‘क्लिअरन्स’ मिळाला. आता लंडनमध्ये सुखाने संसार करू असे स्वप्न बाळगून हा परिवार विमानात बसला. मात्र काही क्षणात झालेल्या अपघातात या परिवाराच्या स्वप्नांची अक्षरशः राखरांगोळी झाली. पाचही जणांचा या अपघातात मृत्यू झाला.
लंडनमध्ये गेल्या सहा वर्षांपासून स्थायिक असलेल्या प्रतिक जोशी हे सॉफ्टवेअर व्यावसायिक. ते मुळचे बांसवाडा (राजस्थान) मधील. त्यांच्या पत्नी डॉ. कोमी व्यास या उदयपूरमधील पँसिफिक हॉस्पिटलमध्ये सेवारत होत्या. पती परदेशात असल्यामुळे वैद्यकीय सेवा व तीन मुलांना सांभाळण्याची दुहेरी जबाबदारी लीलया पार पाडायच्या. आपल्या कुटुंबाला सोबत घेऊन लंडनमध्ये स्थाईक होण्याचे प्रतिक जोशी यांचे स्वप्न होते. मात्र त्यासाठी आवश्यक त्या परवानगी मिळत नसल्याने ते अनेक वर्ष प्रतिक्षेत होते.
अखेरीस अलीकडेच सर्व क्लिअरन्स मिळाले व प्रतिक जोशी हे कुटुंबाला नेण्यासाठी भारतात आले. डॉक्टर पत्नी आपल्या वैद्यकीय सेवेचा राजीनामा दिला. नातेवाईकांचा निरोप घेऊन लंडनमध्ये स्थायिक होण्याचे स्वप्न पूर्ण करण्यासाठी हे दाम्पत्य मुलगी व दोन मुलांसह अहमदाबाद येथील विमान तळावरून विमानात बसले. विमानातून प्रतिक जोशी यांनी आपल्या कुटुंबाची एकत्रित सेल्फी काढून नातेवाईकांना पाठवली. मात्र विमानाने उड्डाण घेतले व काही क्षणात भीषण अपघात झाला. विमानाला लागलेल्या आगीत या कुटुंबाचे लंडनमध्ये स्थायिक होण्याच्या स्वप्नाची मात्र राखरांगोळी झाली.
