नाशिक – विशेष प्रतिनिधी
नाशिकचा भूमिपुत्र भाग्य कुलदीपराज धवन याने राष्ट्रीय पॉवर लिफ्टिंग स्पर्धेत वेगवेगळ्या प्रकारात तीन सुवर्ण पदकं पटकावून महाराष्ट्राची मान उंचावली आहे. तो अवघ्या १५ वर्षाचा असून सब ज्युनियर कॅटेगिरी मध्ये ४९० किलो वजन उचलणारा तो पहिली भारतीय स्पर्धक ठरला आहे.
बिलासपूर (छत्तीसगड) येथे ३१ जुलै ते ३ ऑगस्ट दरम्यान वर्ल्ड पावरलिफ्टिंग फेडरेशन संलग्न युनायटेड पावरलिफ्टिंग असोसिएशन व बिलासपूर जिल्हा पॉवरलिफ्टिंग असोसिएशन, छत्तीसगड यांच्या वतीने आयोजित द मेन/वुमन सब ज्युनियर, ज्युनियर, सिनियर, मास्टर अशा विविध गटात झालेल्या नॅशनल क्लासिक/इक्विप्ड पॉवरलिफ्टिंग चॅम्पियनशिप स्पर्धेत महाराष्ट्राचे प्रतिनिधित्व करणाऱ्या भाग्य धवन याने चमकदार कामगिरी करत तिन्ही प्रकारांमध्ये प्रथम क्रमांक पटकावला आहे.
भाग्य धवन याने सब ज्युनिअर कॅटेगिरी मध्ये बेंचप्रेस प्रकारात ११६.५ कि.ग्रा. बॉडीवेट, १२५ कि.ग्रा. वेट क्लासमध्ये ११० कि.ग्रा. वजन उचलून प्रथम क्रमांक मिळवला. पॉवरलिफ्टिंग प्रकारात स्क्वॅट – १८० कि.ग्रा., बेंचप्रेस – ११० कि.ग्रा., डेडलिफ्ट – २२० कि.ग्रा. अशा एकूण उल्लेखनीय कामगिरीने सुवर्णपदक पटकावले. डेडलिफ्ट प्रकारात २२० कि.ग्रा. वजन उचलून पुन्हा एकदा सुवर्णपदकाची कमाई केली. या कामगिरीमुळे भाग्य धवन यांनी राष्ट्रीय स्तरावर महाराष्ट्राचा नावलौकिक वाढवला असून त्याच्या या यशाबद्दल सर्वत्र अभिनंदनाचा वर्षाव होत आहे.
