नाशिक – विशेष प्रतिनिधी
सातपूर येथील खुनाची घटना ताजी असतानाच पाथर्डी – वडनेर रोड परिसरात खुनाची दुसरी घटना घडली आहे. कॕफेमध्ये चहा पिणारा राशिद हारूण खान या युवकाचा चौघांनी धारदार कोयत्याने वार करून खून केला आहे. यातील मारेकरी एकाच दुचाकीवरून पळताना सीसीटीव्ही फुटेजमध्ये दिसत आहे. २४ तासात शहरात खुनाच्या दोन घटना घडल्याने शहरात खळबळ उडाली आहे.
प्रत्यक्षदर्शींनी दिलेल्या माहितीनुसार, राशिद खान हा पाथर्डी येथील काम आटोपून मुख्य रस्त्यालगत असलेल्या कॕफेमध्ये चहा पिण्यासाठी आला. त्याच्यावर पाळत ठेऊन असलेल्या चौघांनी धारदार कोयते परजत कॕफेत बसलेल्या राशिदवर हल्ला चढवला. या हल्ल्यात गंभीर जखमी झालेल्या राशिदला तात्काळ जिल्हा रुग्णालयात हलवण्यात आले. मात्र तत्पूर्वीच त्याचा मृत्यू झाला होता.
या घटनेची माहिती मिळताच इंदिरानगर पोलिसांनी व राशिदच्या नातेवाईकांनी घटनास्थळी धाव घेतली. यातील चौघा हल्लेखोरांची नावे पोलिसांना कळाली असून त्यांचा शोध सुरू आहे. मृत राशिदच्या नातेवाईकांनी दिलेल्या माहितीनुसार, हल्लेखोर हे एक वर्षांपासून राशिदला एक वर्षापासून त्रास देत असल्याचे सांगितले. सातपूरमध्ये बुधवारी रात्री एका युवकाचा खून झाल्यानंतर २४ तासाच्या आत शहरात दुसरा खून झाल्याने खळबळ उडाली आहे.
