– मोठा अनर्थ टळला….
पंचवटी – प्रतिनिधी
शहरात शारदीय नवरात्र उत्सवाची धामधूम सुरू असून आणि येणाऱ्या काही दिवसात स्थानिक स्वराज्य संस्थांच्या निवडणुका होणार असल्याने आजी – माजी लोकप्रतिनिधींसह भावी इच्छुक उमेदवारांसह विविध पक्षांच्या पदाधिकाऱ्यांनी व सामजिक कार्यकर्ते यांनी पंचवटी विभागात जागोजागी फलक व भव्य दिव्य अशा कमानी उभ्या केल्या आहेत. यातच बुधवार (दि.२४) रोजी दुपारच्या सुमारास मखमलाबाद रोडवरील ड्रिंम कॅसल चौकातील सिग्नल जवळील एका बाजूची कमान कोसळल्याची घटना घडली आहे. यात दोन ते तीन जण जखमी झाल्याचे समजते. दरम्यान कमान तुटल्याने या चौकातील हाय मास्टचे देखील नुकसान झाले आहे.
शहरात सध्या नवरात्र उत्सवाची धामधूम सुरू आहे. आगामी महानगरपालिकेच्या निवडणुका डोळ्यासमोर ठेऊन पंचवटी परिसरासह शहराच्या विविध भागात आजी माजी नगरसेवक, इच्छुक उमेदवार, विविध पक्षांचे पदाधिकारी व कार्यकर्त्यांनी जागोजागी फलक लावलेले आहेत. त्याचप्रमाणे मतदारांना व पक्षातील नेत्यांना आकर्षित व खुश करण्यासाठी आजी माजी नगरसेवकांनी भव्य दिव्य अशा कमानी उभारल्या आहेत. यातून प्रभागातील मतदारांना आकर्षित करण्याचा प्रयत्न सुरू आहे. पंचवटी विभागात चौका चौकात, नाक्यांवर, कॉर्नर, विविध कॉलनी परिसर आणि मुख्य रस्त्यांच्या आजुबाजूला कमानी उभ्या केल्या आहेत. बुधवारी (दि. २४) रोजी दुपारच्या सुमारास मखमलाबाद रोडवरील ड्रिंम कॅसल सिग्नल चौकात असलेली प्रभाग क्रमांक पाचचे भाजपाचे माजी नगरसेवक कमलेश बोडके यांची कमान कोसळली. या घटनेत दोन तीन जण जखमी झाल्याचे समजते. संबंधिताना जखमी खाजगी रुग्णालयात उपचारासाठी दाखल करण्यात आल्याचे समजते. याबाबत भाजपाचे माजी नगरसेवक कमलेश बोडके यांना संपर्क साधला असता सदर घटनेबाबत विचारले असता कमान ही हाय मास्ट पोलावर कलली होती यात कोणीही जखमी झाले नसून सदर कमान उतरवून घेतली असल्याचे सांगितले. 
मोठा अनर्थ टळला….
गत वर्षी मुंबईतील घाटकोपर भागात कमान कोसळून सोळा जणांचा मृत्यू तर ७५ हून अधिक जण जखली झाले होते. त्यानंतर नाशिक शहरातील कमानी व फलकांचे ऑडिट झाले होते. मात्र , विविध सण उत्सवा वेळी विविध पक्षाचे कार्यकर्ते पदाधिकारी आजी माजी लोकप्रतिनिधी , सामाजिक कार्यकर्ते मोठ्या प्रमाणात फलकबाजी करताना दिसून आले आहे. यात विविध भागात भव्य दिव्य अशा कमानी उभारल्या आहेत. या कमानी उभ्या करताना योग्य ती काळजी घेणे गरजेचे असते. मात्र, याकडे दुर्लक्ष झाल्याने मखमलाबाद रोडवरील ड्रीम कॅसल जवळील कोसळलेल्या कमानीने दिसून आले आहे. सुदैवाने कुठलीही जीवित हानी झाली नसल्याने मोठा अनर्थ टळला.
