नाशिक – विशेष प्रतिनिधी
पंचवटी परिसरात झालेल्या वेगवेगळ्या घटनांमध्ये दोघांचा उंचावरून पडल्याने मृत्यू झाला आहे. यात एका बांधकाम मजुराचा समावेश असून या दोन्ही घटनांबाबत म्हसरूळ पोलिसांनी अकस्मात मृत्यूची नोंद केली आहे.
याबाबतचे अधिक वृत्त असे की, पेठरोड परिसरातील एचपी गॅस गोदामा जवळ असलेल्या बांधकाम साईटच्या चौथ्या मजल्यावरून खाली पडल्याने ३० वर्षे मजुराचा मृत्यू झाल्याची घटना घडली आहे. ओमकार हाईट्स येथे राजेश धर्मदास सचदेव यांचे इमारत बांधकाम सुरू असून तीस वर्षे अनोळखी मजूर काम करत असताना चौथ्या मजल्यावरून तोल जाऊन खाली पडला. त्यात त्याच्या डोक्याला, हाताला, पायाला गंभीर मार लागल्याने जिल्हा रुग्णालयात नेण्यात आले. मात्र उपचारापुर्वीच त्याचा मृत्यू झाला होता.
दुसऱ्या घटनेत, बोरगड येथे झाडावर चढून आंबे उतरवण्यासाठी गेलेल्या वृद्धाचा झाडावरून पाय घसरून पडल्याने डोक्याला गंभीर मार लागून मृत्यू झाल्याची घटना घडली. सुभाष भिला धोंडगे (६२, रा. बिडी कामगारनगर, अमृतधाम) असे झाडावरून पडून मयत झालेल्या इसमाचे नाव आहे. धोंडगे कामासाठी बोरगड परिसरात गेले होते. आंबे उतरवण्यासाठी चढले असता झाडावरून पाय घसरून ते खाली पडले. त्यात त्यांना डोक्याला गंभीर मार लागल्याने बेशुद्धावस्थेत त्यांना जिल्हा रुग्णालयात नेण्यात आले. मात्र त्यांचा मृत्यू झाला.
