नाशिक – विशेष प्रतिनिधी
सावकारांच्या जाचाला कंटाळून बोहोरपट्टी मधील युवा कपडे व्यापाऱ्याने विषप्राशन केले होते. खासगी रुग्णालयात उपचार घेत असताना रविवारी रात्री या व्यापाऱ्याचे निधन झाले असून या घटनेने सावकारी व्यवसायाची काळी बाजू पुन्हा प्रकाशात आली आहे.
जिल्हा रुग्णालयातून मिळालेल्या माहितीनुसार, प्रशांत नटवरलाल उर्फ पप्पू जेठवा (वय ३०, रा. बालाजी हाईटस्, ढिकले नगर, पंचवटी) असे त्या व्यापारी युवकाचे नाव आहे. त्यांचे जुन्या सरकारवाडा परिसरात तयार कपड्यांचे विक्रीचे दुकान होते. तर ते काळाराम मंदिर परिसरात वास्तव्यास होते.
मेनरोडवर बेन्टेक्स दागिन्यांची विक्री करणाऱ्या ‘रवी’ नामक मित्राने प्रारंभी प्रशांतसह अनेकांना लाखो रुपयांचा चुना लावून कुटुंबासह पलायन केले होते. यामुळे अडचणीत सापडलेल्या प्रशांतने व्यवसायातील अडचणी दूर करण्यासाठी परिसरातील सावकार बंधूंकडून उसनवार पैसे घेतले होते. मुद्दल व वाढत जाणारे व्याज तसेच सावकारांचा ससेमिरा यामुळे प्रशांत हा विंवचनेत सापडलेला होता. त्रासलेल्या प्रशांत यास सावकारांनी सतत त्रास देणे चालू केल्यामुळे तसेच दररोज दुकानात येऊन रोजची विक्रीही घेतली जायची. विषप्राशन करण्यापूर्वी हेच सावकार बंधू दिवसेंदिवस प्रशांतच्या दुकानात ठिय्या द्यायचे. त्यामुळे तो सतत तणावात वावरत होता, अशीही चर्चा होती. सावकार बंधूंचा सततचा ससेमिरा यामुळे वैतागून प्रशांतने अखेर विषप्राशन केल्याची चर्चा आहे.
प्रशांत यास उपचारासाठी जिल्हा रुग्णालयात दाखल करण्यात आले होते. त्यानंतर मार्केट यार्डानजिकच्या खासगी रुग्णालयात दाखल करण्यात आले होते. रविवारी उपचार सुरू असताना रात्री उशिरा त्याचे निधन झाले. प्रशांतच्या पश्चात पत्नी व दोन लहान मुले आहेत. यामुळे परिवारासह मित्रमंडळीत शोक व्यक्त होत आहे. मेनरोडवरील अनेक लहान व्यापारी तसेच हॉकर्स यांना सावकारी पाशात अडकवून त्यांची लूट करण्याच्या घटना यापूर्वीही घडल्या आहेत.
