नाशिक – विशेष प्रतिनिधी
इंदिरानगर पोलीस ठाण्याच्या हद्दीत झालेल्या तीन घटनांमध्ये महिलांच्या गळ्यातील सौभाग्य लेणं खेचून पळवण्यात आले. या घटनांमध्ये एक लाख ८० हजारांचा ऐवज पळवण्यात आला असून इंदिरानगरमध्ये चेन स्नॅचिंगच्या घटना पुन्हा घडू लागल्याने महिलांमध्ये भितीचे वातावरण आहे.
पोलिसांनी दिलेल्या माहितीनुसार, सुजाता सुनिल शिंदे (वय ५४, रा. सुकल्प बंगला प्लॉट न २३ बी, जायभावे नगर, पाथर्डी फाटा, जगन्नाथ मंदिर जवळ इंदिरानगर) या पतीसह घरी आव्हाड पेट्रोल पंपाजवळून घरी परतत असतांना क्रिकेट टर्फजवळ पाठीमागून येणाऱ्या मोटार सायकलवरून दोघेजण आले. त्यापैकी पाठीमागे बसलेल्या युवकाने श्रीमती शिंदे यांच्या गळ्यातील एक लाख रुपये किंमतीची व २५ ग्रॅम वजनाची सोन्याची चेन खेचली. त्यानंतर दोघांनी पळ काढला. हवालदार झिरवळ तपास करत आहेत.
श्रीमती रिया रामनाथ मांजरेकर (वय ६०, रा. फ्लॅट नं ५, वरदविनायक अपार्टमेंट, जायभावे नगर, सम्राट सिंफोनीच्या बाजुला, पाथर्डी फाटा) या गामणे ग्राऊंड, जायभावे नगर येथून भाजी घेवून परत जात असताना मागुन येणाऱ्या काळ्या रंगाच्या मोटारसायकल वरून दोघेजण आले. त्यापैकी मागे बसलेल्याने श्रीमती मांजरेकर यांच्या गळयातील ८ ग्रॅम वजनाची व ४० हजार रुपये किंमतीची सोन्याची पोत खेचून म्हाडा बिल्डींग कर्मा हाईट्च्या दिशेने पळून गेले. तर श्रीमती दुर्गा वसंत धोंडगे (रा. गोमती अपार्टमेंट, फ्लॅट नं. २, अलकापुरी सोसायटी, प्रशांत नगर पाथर्डी फाटा) या प्रशांत नगर, पाथर्डी फाटा येथील सावली मेडीकल समोरून जात असताना काळ्या रंगाच्या मोटारसायकल वरून दोघेजण आले. त्यापैकी मागे बसलेल्याने श्रीमती धोंडगे यांच्या गळ्यातील ८ ग्रॅम वजनाची) व ४० हजार रुपये किंमतीची सोन्याची खेचून पळवली. इंदिरानगर पोलीस ठाण्याच्या वरिष्ठ पोलीस निरीक्षक श्रीमती सोनवणे यांच्या मार्गदर्शनाखाली हवालदार पवार तपास करत आहेत.
