नाशिक – विशेष प्रतिनिधी
श्रावणमासाच्या पावन संध्याकाळी गोदावरी सेवा समिती, नाशिक यांच्या वतीने शुक्रवारी (१ ऑगस्ट) सायंकाळी ६ वाजता रामकुंड गोदावरी तीरावर गोदावरी महाआरती संपन्न होणार आहे.
या महाआरतीत शीख पंथातील मान्यवर संत व धर्मप्रेमी नागरिकांचा सन्माननीय सहभाग लाभणार
असून हा कार्यक्रम केवळ धार्मिक विधी नसून, समरसता, श्रद्धा आणि राष्ट्रभावनेचा सांस्कृतिक संगम ठरणार आहे.
याप्रसंगी पूजनीय जत्थेदार बाबा रणजीतसिंगजी गुप्तसर गुरुद्वारा, मनमाड तसेच सरदार मलकितसिंगजी बाल, एक्झिक्युटिव्ह चेअरमन, महाराष्ट्र राज्य पंजाबी साहित्य अकादमी (अल्पसंख्याक विकास विभाग), सरदार जसपालसिंगजी सिद्धू, प्रेसिडेंट, सिक्ख कोऑर्डिनेशन कमिटी, सरदार राजकमलसिंगजी गाडीवाले, निष्काम सेवा प्रतिष्ठान, नांदेड, डॉ. विजय सदबीरसिंगजी, गुरुद्वारा बोर्ड, श्री हुजूर सचखंड अबचल नगर साहेब, नांदेड यांची प्रमुख उपस्थिती असेल. कार्यक्रमाअंतर्गत शीख परंपरेतील दसगुरूंचं सामूहिक पूजन, भावगीतांमधून राष्ट्रभक्तीची उंचावणारी कीर्तनमयी संध्या व नंतर विधिवत महाआरती होईल. याप्रसंगी उपस्थित रहाण्याचे आवाहन गोदावरी सेवा समितीचे अध्यक्ष जयंत गायधनी आणि विश्वस्त रणजीतसिंग आनंद यांनी केले आहे.
