नाशिक – विशेष प्रतिनिधी
अंगी असलेल्या गुणांचा सदुपयोग करण्यापेक्षा त्याचा दुरुपयोग करून स्वतःचे उखळ पांढरे करणारे अनेक महाभाग समाजात आपल्या अवतीभोवती वावरत असतात. असाच एका महाभागाचा अनुभव शहरातील लॉटरी विक्रेत्यांनी घेतला असून बेमालूमपणे लॉटरी तिकिटावर विशिष्ट अंक चिटकवून ‘विनिंग’ ची रक्कम खिशात घालण्याचा प्रकार समोर आला आहे. या भामट्यास लॉटरी विक्रेत्यांनी चोप देत वसूली चालवली आहे.
लॉटरी व्यवसायात विविध राज्यांची तिकिटे विक्रीस असतात. त्या तिकिटांद्वारे अनेक शौकीन आपले नशीब कसे उघडेल या अपेक्षेत असतात. झटपट व बुकींगवर मर्यादा आल्याने या लॉटरीला तसा चांगला प्रतिसाद लाभत आहे. याच व्यवसायात नागालँड सरकारची ‘डियर’ नावाची लॉटरी असून तिचे दिवसभरात तीन ‘ड्रॉ’ निघतात. एका तिकिटाची किंमत सहा रुपये असून शेवटचे चार नंबर जुळले तर ग्राहकास १२० रुपये मिळतात.
लॉटरी खेळणाऱ्या अनेक ग्राहकांपैकी एकाने वेगळीच शक्कल लढवत विक्रेत्यांकडून पैसे लुटण्यास सुरूवात केली. हा महाभाग सराफ बाजारातील बंगाली कारागीर असून दागिने घडवण्याचे कौशल्य त्याने भलत्याच कामासाठी वापरण्याचा निर्णय घेतला. लॉटरीच्या तिकिटावरील शेवटच्या चार आकड्यांपैकी एक नंबर दुसऱ्या तिकिटावरून कापून घेत चिटकावयचा. हे काम इतके बेमालूम असायचे की लॉटरी विक्रेत्यांना त्याची खबरही लागायची नाही. प्रत्येक विक्रेत्याला हा महाभाग ‘विनिंग’ चे प्रत्येकी पाच तिकिटे देऊन ६०० रुपये खिशात घालायचा. असे प्रकार त्याने शहरातील बऱ्याच लॉटरी दुकानांवर केले व हजारो रुपये उकळले.
लॉटरी विक्रेते ही तिकीटे ‘विनिंग’ म्हणून मुंबईतील मुख्य स्टॉकिस्ट पाठवायचे. परंतू इतकी ‘विनिंग’ तिकिटे कशी काय आली म्हणून बारकाईने तपासणी केली असता नाशिकमधील या भामट्याची हातचलाखी मुंबईतील स्टॉकिस्टच्या लक्षात आली. त्याने ही तिकिटे ‘विनिंग’ नसल्याचे नाकारत परत विक्रेत्यांना पाठवली तेव्हा या विक्रेत्यांना आपण गंडवले जात असल्याचे लक्षात आले. त्यांनी संबंधित खेळीवर लक्ष ठेवण्यास सुरुवात केली.
मेनरोडवरील एका दुकानात शनिवारी (दि. २६) हा ग्राहक पाच ‘विनिंग’ तिकीटे घेऊन आला. विक्रेत्याला ‘स्टॉकिस्ट’ कडून कळालेल्या फंड्यानुसार ही तिकिटे बोटाने तपासली असता त्यातील एक आकडा चिटकवण्यात आल्याचे लक्षात आले. पाचही तिकिटे तशी बनवलेली होती. त्यामुळे बंगाली कारागिरास पकडून जाब विचारण्यात आला. आपले पितळ उघडे पडल्याचे पाहून त्यालाही कबुली देण्याशिवाय गत्यंतर नव्हते. तो भामटा पकडला गेल्याचे कळताच इतर विक्रेतेही आले. त्यांनी त्यास चोप देत आता बनावट तिकिटांनुसार वसूली चालू केली आहे.
