पंचवटी – विशेष प्रतिनिधी
नांदूर नाका परिसरात पोळा सणाच्या दिवशी राहूल धोत्रे याचा खून व अजय कुसाळकर याच्या खुनाचा प्रयत्न याप्रकरणी फरार असलेला स्थायी समितीचा माजी अध्यक्ष व भाजपाचा माजी नगरसेवक उद्धव उर्फ बाबा बाबुराव निमसे याने सोमवारी शहर पोलिसांच्या गुंडा विरोधी पथकासमोर शरणागती पत्करली होती. त्यास
मंगळवारी जिल्हा न्यायालयासमोर हजर केले असता पाच दिवस पोलीस कोठडीत ठेवण्याचे आदेश न्यायालयाने दिले आहेत.
पोळा सणाच्या (दि.२२ अॉगस्ट) दिवशी दुचाकीचा धक्का लागल्यावरून झालेल्या वादानंतर निमसे समर्थकांनी राहूल धोत्रे तसेच त्याचा आतेभाऊ अजय कुसाळकर यांच्यावर धारदार शस्त्राने हल्ला चढवण्यात आला होता. यात दोघेही गंभीर जखमी झाले होते. खासगी रुग्णालयात उपचार घेताना राहूलचा मृत्यू झाल्याने या गुन्ह्याला खुनाचे वाढीव कलम लागले होते.
यात भाजपचा माजी नगरसेवक व स्थायी समितीचा माजी अध्यक्ष उद्धव निमसे संशयित म्हणून समावेश होता. अटक टाळण्यासाठी उद्धव निमसे याने प्रथम जिल्हा न्यायालय व नंतर मुंबई उच्च न्यायालयात धाव घेतली होती. मात्र दोन्ही ठिकाणी अटकपूर्व जामीन अर्ज फेटाळण्यात आले होते. एवढेच नाही तर उच्च न्यायालयाने पोलिसांच्या तपासाबाबत ताशेरे ओढले होते. त्यानंतर निमसे हा सोमवारी गुंडा विरोधी पथकाला शरण आला होता. याप्रकरणी पुढील तपास सहायक आयुक्त शेखर देशमुख करत आहेत.
