नाशिक – विशेष प्रतिनिधी
अंबड लिंकरोड परिसरातील ए.ए. ट्रेडर्स या स्क्रॅप
दुकानातून २० टनाहून अधिक स्क्रॅप माल चोरून नेणाऱ्या व या मालाची मराठवाडा येथील जालना शहरात विक्री करणाऱ्या भामट्यास गुन्हे शाखेच्या युनिट दोनच्या पथकाने जेरबंद केले आहे. चोरीचा माल विक्री केल्यानंतर मिळालेले पाच लाख रुपये तसेच गुन्ह्यात वापरलेले आयशर वाहन असा १० लाखांचा मुद्देमाल हस्तगत करण्यात आला आहे.
याबाबतचे अधिक वृत्त असे की, अंबड लिंकरोड येथे असलेल्या ए.ए ट्रेडर्स नावाचे स्क्रॅप भंगार दुकानावरून आयशर गाडी (एमएच ०९ – सीए १०१३) ८,८२, ३६९ रूपये किंमतीचा २० टन २१० किलो माल चोरीस गेला होता. याबाबत अंबड पोलीस ठाण्यात गुन्हा दाखल होता. या गुन्ह्याचा समांतर तपास करताना गुन्हे शाखा युनिट दोनचे अधिकारी व कर्मचारी यांनी घटनास्थळी भेट दिली. तसेच तांत्रिक विश्लेषणाचा आधार घेत यातील आरोपी आसिफ युसुफ पठाण (वय-२९, रा. सुंदरनगर, ता. जि. जालना) हा चंदनझिरा (जि. जालना) परिसरात असल्याचे निष्पन्न केले.
पोलीस आयुक्त संदिप कर्णिक, गुन्हे शाखेचे उपायुक्त प्रशांत बच्छाव, सहायक आयुक्त संदिप मिटके यांच्या मार्गदर्शनाखाली वरिष्ठ निरीक्षक मधुकर कड, गुन्हेशाखा युनिट दोनचे सहायक निरीक्षक हेमंत तोडकर, डॉ. समाधान हिरे, श्रेणी उपनिरीक्षक मुक्तारखान पठाण, सहायक उपनिरीक्षक गुलाब सोनार, हवालदार नंदकुमार नांदुर्डीकर, संजय सानप, प्रकाश बोडके, अतुल पाटील, प्रकाश महाजन, चंद्रकांत गवळी, वाल्मिक चव्हाण, मनोज परदेशी, परमेश्वर दराडे, प्रवीण वानखेडे यांनी जालना येथे जावून या गुन्हयामध्ये अहोरात्र परिश्रम करून तांत्रिक माहिती व मानवी कौशल्याचे आधारे आरोपी आसीफ पठाण याचा शोध घेतला. तेव्हा आसिफ युसुफ पठाण हा जालना येथील छत्रपती संभाजीनगर जालना रोडवरील टोल नाक्याचे बाजुला असलेल्या किर्ती ट्रान्सपोर्ट पार्किंगमध्ये आहे अशी माहिती मिळाली. त्यानुसार पथकाने सापळा रचला असतांना पोलिसांची चाहुल लागताच आरोपी पळु लागल्याने त्यास पथकाने पाठलाग करून जेरबंद केले. या गुन्ह्याची उकल करताना तांत्रिक विश्लेषण शाखेच्या सहायक निरीक्षक तारडे मॅडम यांचेही सहकार्य लाभले.
