नाशिक – विशेष प्रतिनिधी
शहरातील प्रख्यात ‘कुलकर्णीज् पावभाजी’चे संचालक हेमंत कुलकर्णी यांच्यावर भाभानगर परिसरात रात्री ११.३० वाजेच्या सुमारास दोघा युवकांनी धारदार शस्त्राने हल्ला केला. कुलकर्णी यांच्या व्यवसायाचे पैसे असलेली बॅग होती. ही खेचण्यासाठी चोरट्यांनी हरप्रकारे प्रयत्न केले. त्यामुळे पाळत ठेवून जबरी चोरीच्या उद्देशाने हा हल्ला झाल्याचा संशय आहे.
महात्मा गांधी रोडवरील यशवंत व्यायाम शाळेसमोर ‘कुलकर्णीज् पावभाजी’ हे लोकप्रिय ठिकाण आहे. गुरुवारी रात्री दैनंदिन कामे आटोपल्यानंतर गल्ल्यातील रोकड घेऊन हेमंत कुलकर्णी हे दुचाकीने भाभानगर मधील घराकडे निघाले. मुंबई नाका पोलीस ठाण्यासमोरून भाभानगर मध्ये प्रवेश केल्यानंतर माजी आमदार वसंतराव गिते यांच्या निवासस्थाना जवळील रस्त्यावर गतीरोधक असल्याने दुचाकीचा वेग कमी केला. त्याचवेळी दुचाकीवरून आलेल्या दोघा युवकांनी आपले वाहन कुलकर्णी यांच्या वाहनासमोर आडवे लागले. त्यामुळे त्यांचा तोल गेला.
गाडी व स्वतःला सावरत असतानाच दोघा युवकांनी आपल्याजवळील धारदार लांब पात्याचे चाकू परजत कुलकर्णी यांच्या गळ्यातील पैशांची चामडी बॅग हिसकावण्याचा प्रयत्न केला. चोरट्यांचा हेतू लक्षात येताच कुलकर्णी यांनी प्रतिकार व मदतीसाठी आरडाओरड करण्यास सुरुवात केली. ते पहाताच एकाने चाकूने त्यांच्या हातावर वार करत बॅग ताब्यात घेण्याचा प्रयत्न केला. मात्र बॅगेवरील पकड अधिक घट्ट करत माजी आमदार गिते यांच्या निवासस्थानाकडे धाव घेतली. हा प्रकार पाहून स्थानिक रहिवाशाने पाण्याने भरलेली जार चोरट्यांच्या दिशेने भिरकावला. त्यामुळे प्रतिकार होतेय हे पाहून चोरटे कुलकर्णी यांचा ५० हजार रुपये किंमतीचा मोबाईल घेऊन दुचाकीने पसार झाले.
या हल्ल्यात कुलकर्णी यांच्या हाताला जखम झाली असून शस्त्रक्रियेनंतर आठ टाके घालण्यात आले आहे. भाभानगर सारख्या वर्दळीच्या मार्गावर तसेच पोलीस ठाणे जवळच असताना घडलेल्या या घटनेमुळे रहिवाशांमध्ये भितीचे वातावरण पसरले आहे. याप्रकरणी मुंबई नाका पोलिसांनी गुन्हा नोंदविला आहे.
