लंडन –
क्रिकेटच्या खेळात ‘चोकर्स’ म्हणून हेटाळणी झालेल्या दक्षिण आफ्रिका संघाने जागतिक क्रिकेट अजिंक्यपद स्पर्धेत बलाढ्य अॉस्ट्रेलिया संघाला पराभूत करत अजिंक्यपद पटकावले. आयसीसी स्पर्धेत गेली २७ वर्ष अजिंक्यपद पटकावण्यासाठी आसुसलेल्या दक्षिण आफ्रिका संघाची प्रतिक्षा अखेर शनिवारी क्रिकेटची पंढरी म्हणून ओळखल्या जाणाऱ्या लॉर्डस् मैदानावर संपली.
पायाला दुखापत झालेली असतानाही ६६ धावांची खेळी करणारा कर्णधार टेम्बा बवूमा व एडन माकरम याची १२६ धावांची शतकी खेळी यासमोर कांगारूंचा मारा निष्प्रभ ठरला. माकरम व बवूमा यांच्यातील १४७ धावांच्या खेळीमुळे दक्षिण आफ्रिकेच्या विजयाचा पाया रचला. शनिवारी चौथ्या दिवसाचा खेळ सुरू झाला तेव्हा बवूमा, स्टब्स व माकरम ठराविक अंतराने बाद झाले मात्र तोपर्यंत विजय आवाक्यात आला होता. अखेरीस पाच गडी राखून दक्षिण आफ्रिकेने अजिंक्यपदावर आपले नाव कोरले. फलंदाज बेडींगहमने विजयी चौकार मारला तेव्हा आनंदी झालेले दक्षिण आफ्रिकेचे खेळाडू तेवढेच भावनिक झाले होते.
