नाशिक – विशेष प्रतिनिधी
शहरात शुक्रवारी (दि.५) निघणारा ईद-ए-मिलाद जुलूस व शनिवारी (दि.६) होणार श्री. गणेश विसर्जन मिरवणूक यादरम्यान कायदा व सुव्यवस्था अबाधित रहावी यासाठी शहर पोलिसांनी विशेष बंदोबस्ताचे नियोजन करण्यात आले आहे. दोन्ही मिरवणुकीवर ‘एआय’ आधारित सीसीटीव्ही कॅमेरांची निगराणी रहाणार आहे.
शहरात गणेशोत्सव दरम्यान ८८४ सार्वजनिक गणेश मंडळे तर १,४३,८०६ घरगुती गणपतीची स्थापना करण्यात आली आहे. यासाठी पोलीस आयुक्त संदीप कर्णिक यांच्या नेतृत्वाखाली शहर पोलीस ‘श्रीं’चा उत्सव निर्विघ्नपणे संपन्न व्हावा, यासाठी कार्यरत आहेत.
शहरात ईद-ए-मिलाद जुलूस शुक्रवारी तर विसर्जन मिरवणूक शनिवारी निघणार असून मार्गावर एआय प्रणाली तंत्रज्ञानावर अधारित सिसिटीव्ही कॅमेरेव्दारे लक्ष ठेवण्यात येणार आहे. तसेच ईद ए मिलाद जुलूस व श्री. गणेश विसर्जन मिरवणुकीदरम्यान हालचालींवर लक्ष ठेवणेकरिता ड्रोन कॅमेरांचा प्रभावीपणे वापर करण्यात येणार आहे. बंदोबस्तासाठी पोलीस उपायुक्त (४), सहायक आयुक्त (६), पोलीस निरीक्षक (४७), सहायक व उपनिरीक्षक (१३०), प्रशिक्षणार्थी उपनिरीक्षक ३७, अंमलदार पुरुष (२०००) व महिला (४००), होमगार्ड पुरुष (११००) व महिला (४००), स्ट्रायकिंग फोर्स (१३), आरसीपी (२), राखीव सुरक्षा दल (एक कंपनी), बॉम्ब शोधक व नाशक पथक (२) तैनात असतील.
