नाशिक – विशेष प्रतिनिधी
प्रचंड उकाड्यामुळे त्रस्त झालेल्या नाशिककरांना मे व जूनमध्ये झालेल्या पावसामुळे दिलासा मिळाला होता. त्यातच जूनमध्ये पर्जन्यराजाने नाशिककरांवर कृपादृष्टी दाखवत विक्रमी नोंद केल्याने गोदावरीला दुसऱ्यांदा पूर आला आहे. तर गंगापूर धरणही सुमारे ६५% भरले आहे. पावसाचे हे सातत्य कायम राहिल्यास, गोदेला महापूर येण्याची शक्यता जाणकारांनी व्यक्त केली आहे.
शहरासह नाशिक जिल्ह्यात यावर्षी पावसाचे रूद्ररुप बघावयास मिळाले. बेमोसमी पावसासह मोसमी पावसानेही धूमधडाक्यात जोरदार हजेरी लावल्यामुळे धरणांचा जलसाठा निम्म्यापेक्षा अधिक भरला आहे. शहर व परिसरात मागील दहा वर्षामध्ये जूनमध्ये कधी नव्हे इतका पाऊस यंदा पडला. या २३ दिवसांत ३१५ मिमी पाऊस पेठरोडवरील भारतीय हवामान निरीक्षण केंद्रात मोजण्यात आला. यापूर्वी २०१७ साली जूनमध्ये सर्वाधिक २४९.४ मिमी इतका पाऊस पडल्याची उच्चांकी नोंद हवामान केंद्राच्या दप्तरी होती. जूनमध्येच गोदावरी, दारणा, कडवा या नद्यांमधून विसर्ग सुरू करावा लागला. यावर्षी मे महिन्यात १८७ मिमी इतका पाऊस पडला होता.
यानंतर ५ जून रोजी शहरात जोरदार सरी बरसल्या. १६ मिमी इतकी नोंद त्यादिवशी झाली होती. त्यानंतर पाच दिवस विश्रांती घेत पावसाने पुन्हा दमदार हजेरी लावली होती. १५ जूनपासून आतापर्यंत पावसाचा जोर शहरात कमी-अधिक फरकाने टिकून राहिला आहे. यामुळे गोदावरी नदी खळाळून वाहू लागली असून यावर्षी गोदेच्या पूराचे मापक असलेल्या दुतोंड्या मारुतीच्या मूर्तीला वरूणराजाच्या कृपेने गोदामाईकडून जूनमध्येच जलाभिषेक घालण्यात आला. आतापर्यंत दोनवेळा गोदावरी नदीला पूरसदृश आहे.
पावसाचा हा धडाका कायम राहिल्यास गोदेला यंदा महापूराची शक्यता ज्येष्ठ जाणकारांनी व्यक्त केली आहे. त्यामुळे गोदाकाठचे रहिवाशी व व्यापारी यांनी सावधगिरी बाळगण्याची गरज आहे. गोदाघाटावर धार्मिक विधीसाठी येणाऱ्या नागरिकांच्या सुरक्षिततेसाठी प्रशासनाने आवश्यक त्या उपाययोजना करणे गरजेचे आहे.
(सर्व छायाचित्रे – सचिन निरंतर)
