पंचवटी – प्रतिनिधी
गणेशोत्सव कालावधीत प्रवासी मोठ्या प्रमाणात गावी ये-जा करतात. त्याचा फायदा घेत खासगी बसचालक प्रवाशांकडून ज्यादा भाडे आकारणी करत असल्याबाबत तक्रार प्राप्त झाल्याने परिवहन आयुक्तांच्या आदेशानुसार नाशिक प्रादेशिक परिवहन विभागातर्फे शनिवार (दि.२३) पासून ते (दि.९) सप्टेंबर दरम्यान खासगी कंत्राटी प्रवासी बसची तपासणी करण्यात येणार असल्याची माहिती सहाय्यक प्रादेशिक परिवहन अधिकारी महेश देशमुख यांनी दिली.
शासनाने एप्रिल २०१८ च्या निर्णयानुसार भाडे दर निश्चित केले असून, महाराष्ट्र राज्य मार्ग परिवहन महामंडळाच्या त्या-त्या संवर्गातील टप्पा वाहतुकीचे सद्यस्थितीतील भाडे दर विचारात घेऊन खासगी कंत्राटी परवाना वाहनांचे त्या संवर्गासाठी संपूर्ण बससाठी येणाऱ्या प्रतिकिमी भाडेदराच्या ५० टक्केपेक्षा अधिक राहणार नाहीत, असे कमाल भाडेदर निश्चित केले आहेत. त्या अनुषंगाने शासनाने निश्चित केलेल्या कमाल भाडेदरापेक्षा कमाल भाडेदरापेक्षा जास्तीचे भाडे आकारणाऱ्या खासगी कंत्राटी बसची तपासणी करून दोषी आढळलेल्या वाहनांवर कारवाई करण्याबाबत सूचना दिल्या.
दि.२७ ऑगस्ट पासून गणेशोत्सव सुरू होत आहे. गणेशोत्सव सणानिमित्त प्रवासी गावी जात येत असतात. त्याच दरम्यान खाजगी प्रवासी बसेस कडून जादा भाडे आकारणी केल्याच्या तक्रारी प्राप्त होत असतात. त्यामुळे गणेशोत्सव काळात जास्तीचे भाडे आकारणाऱ्या खासगी कंत्राटी बसचालकांविरुद्ध १८००२३३१५१६ हेल्पलाईन क्रमांक किंवा rto.15mh@mah.gov.in मेलवर तक्रार नोंदवावी, असे आवाहन सहाय्यक प्रादेशिक परिवहन अधिकारी महेश देशमुख यांनी केले आहे.
