नाशिक – विशेष प्रतिनिधी
शहरात व पाणलोट क्षेत्रात बुधवारी सुरु असलेल्या संततधारेमुळे गोदावरीला पूर आला असून दुतोंड्या मारूतीच्या छातीपर्यंत पाणी आले आहे. दरम्यान रोकडोबा हनुमान मंदिराजवळ एक कार पुराच्या पाण्यात अडकली असून ती पात्रात वाहून जाऊ नये यासाठी दोरखंडाने बांधून ठेवण्यात आली आहे.
शहर व परिसरात बुधवारी रात्रीपासूनच संततधार सुरु आहे. गुरूवारी सकाळी पावसाचा जोर वाढल्यानंतर गोदावरीच्या पाणी पातळीत झपाट्याने वाढ होऊ लागली. खबरदारीचा उपाय म्हणून रामकुंडालगतची तसेच रामसेतूजवळ असलेल्या पार्किंगमधून वाहने हलविण्यात आली. दुपारनंतर गोदावरीच्या पाणी पातळीत अचानक वाढ झाली. पुराचे मापक समजल्या जाणाऱ्या दुतोंडी हनुमानाच्या छातीपर्यंत पाणी लागल्याने पूरस्थिती निर्माण झाली. त्यामुळे गोदाकाठचे रहिवाशी व व्यापारी सावध झाले होते.
याचदरम्यान गाडगे महाराज पूल ते रोकडोबा व्यायाम शाळादरम्यान पार्क केलेली कार पुराच्या पाण्यात अडकली. पाण्याच्या प्रवाहासोबत पात्रात वाहून जाऊ नये म्हणून परिसरातील कार्यकर्त्यांनी कार दोरखंडाने बांधून ठेवली. ही कार पर्यटकाची असून पाण्याची पातळी वाढली तेव्हा कारमध्ये कोणीही नव्हते. कार पाण्यातून काढण्यासाठी क्रेनचा वापर केला जाणार आहे.
