नाशिक – विशेष प्रतिनिधी
रोटरी क्लब ऑफ नाशिक तर्फे मॅग्नम हॉस्पिटल, येथे ग्लोबल ग्रँट- कॅथ लॅब प्रकल्पांतर्गत दुर्गम भागातील पाच ते बारा वर्षे या वयोगटातील बारा मुलांवर यशस्वी हृदय शस्त्रक्रिया करण्यात आल्या. रोटरी क्लब ऑफ नाशिक सामाजिक बांधिलकीच्या भावनेने समुदाय सेवा व रोगप्रतिबंध व उपचार या सेवा मार्गांशी सुसंगत तसेच समाजातील वंचित लोकांसाठी जीवनावश्यक आरोग्य सेवा उपलब्ध करून देणासंबंधीचे अनेक प्रकल्प सातत्याने राबवित असते.
या उपक्रमाचा एक भाग म्हणून नाशिक जिल्ह्यातील दुर्गम भागातील पाच ते बारा वर्षे वयोगटातील बारा मुलांना जन्मताच त्यांच्या हृदयामध्ये छिद्र होते. त्यामुळे त्यांच्या बाबतीत वेळेवर योग्य ते निदान उपचार न झाल्यास अशा मुलांच्या आरोग्यावर आणि त्यांच्या आयुष्यावर गंभीर परिणाम संभावतात. तशातच या शस्त्रक्रियांचा खर्च दीड लाख ते पाच लाख रुपयांपर्यंत येत असल्याने ग्रामीण भागातील अशा आर्थिकदृष्ट्या दुर्बल घटकांना तो खर्च परवडत देखील नाही. रोटरी क्लब ऑफ नाशिकच्या या उपक्रमामुळे या मुलांना मोफत व गुणवत्तापूर्ण उपचार मिळालेत.
यावेळी मॅग्नम हॉस्पिटलचे ख्यातनाम हृदय रोग तज्ज्ञ डॉ.मनोज चोपडा यांनी वैयक्तिकरित्या रुग्ण मुलांशी आणि त्यांच्या पालकांशी संवाद साधून त्यांना शस्त्रक्रियेची प्रक्रिया समजावून सांगितली. या शस्त्रक्रियांमुळे मुले आपले भावी आयुष्य यशस्वीरित्या जगू शकतील असेही त्यांनी प्रतिपादन केले. या कार्यक्रमासाठी रोटरी क्लब ऑफ नाशिकचे अध्यक्ष डॉ. गौरव सामनेरकर, सचिव सीए रेखा पटवर्धन तसेच सदस्य रवी महादेवकर, प्रकल्प सचिव मकरंद चिंधडे आदी उपस्थित होते.
