नाशिक – विशेष प्रतिनिधी
दिंडोरी कळवण रस्त्यावरील शिवनेरी हॉटेल व संस्कृती लॉनच्या समोर बुधवारी रात्री उशिरा झालेल्या अपघातात सात ठार झाले आहेत. अपघातामध्ये दोन वर्षीय बालकासह तीन महिलांचा समावेश आहे. वाढदिवस साजरा करून नाशिकहून परतताना हा अपघात झाल्याचे समजते. मृत व्यक्ती या कोशिंबे देवठाण व सारसाळे येथील आहेत. यामुळे परिसरात हळहळ व्यक्त होत आहे.
पोलिसांनी दिलेल्या माहितीनुसार, अल्टो कार व मोटारसायकल यांची धडक झाली. त्यानंतर अल्टो कार रस्त्याच्या कडेला असलेल्या चारीतील पाण्यात पडली. कार पाण्यात उलटी पडल्याने आतील प्रवाशांना बाहेर निघता आले नाही. त्यामुळे बुडून त्यांचा मृत्यू झाला. या अपघातातून दोघे बचावले असून त्यांच्यावर नाशिकच्या जिल्हा रुग्णालयात उपचार सुरू आहेत. अपघाताचे वृत्त समजताच दिंडोरी पोलीस ठाण्याचे निरीक्षक रघुनाथ शेगर व सहकाऱ्यांनी घटनास्थळी धाव घेतली.
अपघातातील मृतांची नावे –
देविदास पंडित गांगुर्डे (वय २८), मनीषा देविदास गांगुर्डे, (वय २३), भावेश देविदास गांगुर्डे (वय २, रा. सारसाळे ता. दिंडोरी), उत्तम एकनाथ जाधव (वय ४२), अलका उत्तम जाधव, (वय ३८, रा. कोशिंबे ता. दिंडोरी), दत्तात्रेय नामदेव वाघमारे, (वय ४५), अनुसया दत्तात्रय वाघमारे (वय ४०, रा देवठाण ता. दिंडोरी).
